#PE-ARM-2026-A948

🔴2026 թվականի մայիսի 13-ին ՀՀ վարչապետի մասնակցությամբ իշխող «Քաղաքացիական պայմանագիր» կուսակցության նախընտրական քարոզարշավի շրջանակներում Ապարան համայնքում արձանագրվել են հանրակրթական ուսումնական հաստատություններում քաղաքական գործունեության արգելքի խախտման և քարոզչությանը անչափահասների ներգրավման դեպքեր։ ❎Տեղում արձանագրվել է, որ համայնքի և հարակից բնակավայրերի մի շարք դպրոցների տնօրեններ և ուսուցիչներ աշխատանքային ժամերին՝ դասերի ընթացքում, կազմակերպված մասնակցել են միջոցառմանը։ ❗️Առավել մտահոգիչ է, որ ուսուցիչների և տնօրինության անմիջական հրահանգով աշակերտները դուրս են բերվել դասապրոցեսից՝ վարչապետին դիմավորելու և քարոզչական միջոցառմանը մասնակցություն ապահովելու նպատակով։ Երեխաներին բաժանվել են դրոշներ, ընդ որում՝ դպրոցականներին նախապես տրվել են պարտադրողական բնույթի ցուցումներ անգամ արտաքին տեսքի, հագուստի և սանրվածքի վերաբերյալ՝ հորդորելով ներկայանալ հյուսերով։ ❗️Արձանագրվել են նաև դեպքեր, երբ որոշ դպրոցների ղեկավարներ և մանկավարժներ հեռախոսազրույցների ընթացքում բարձրաձայն և խիստ տոնով հրահանգավորել են՝ պահանջելով ապահովել երեխաների պարտադիր և կազմակերպված մասնակցությունը։ ❗️Ըստ հաստատված տվյալների՝ Ծաղկաշեն գյուղի դպրոցի աշակերտներին ոչ միայն ազատել են դասերից հանրահավաքին մասնակցելու համար, այլև երեխաներին բաժանվել են իշխող «Քաղաքացիական պայմանագիր» կուսակցության և նրա քաղաքական քարոզչության հետ ասոցացվող խորհրդանիշներով շապիկներ։ 🔴Միջոցառման ընթացքում մեկ անձ ակտիվորեն համակարգել է մարդկանց տեղաշարժը, դիմավորել երեխաներին, բաժանել քարոզչական բնույթի դրոշներ և հստակ հրահանգներ տվել ներկաներին՝ տեղաբաշխման վերաբերյալ։ ❗️Արձանագրվել է նաև մասնավոր հատվածի աշխատակիցների, մասնավորապես՝ «Գնթունիք» ընկերության անձնակազմի կազմակերպված ներկայությունը քաղաքական միջոցառմանը։ 📌Հանրակրթական ուսումնական հաստատությունների ներգրավումը նախընտրական գործընթացներին, ուսումնական պրոցեսի կասեցումը և անչափահասներին որպես քաղաքական ֆոն օգտագործելը հակասում են ուսումնական հաստատությունների ապաքաղաքականացվածության սկզբունքներին և ժողովրդավարական ընտրությունների միջազգային չափանիշներին։ «Հանրակրթության մասին» ՀՀ օրենքի համաձայն՝ ուսումնական հաստատություններում արգելվում է իրականացնել քաղաքական գործունեություն կամ քարոզչություն, իսկ ՀՀ ընտրական օրենսգիրքն արգելում է նախընտրական քարոզչության կազմակերպումն ու իրականացումը ուսումնական հաստատությունների աշխատողների կողմից՝ իրենց լիազորություններն իրականացնելիս կամ ի պաշտոնե հանդես գալիս։ ⚖️Դպրոցի տնօրինության կողմից սեփական լիազորությունների և պաշտոնեական դիրքի նմանօրինակ չարաշահումը ենթակա է խիստ իրավական գնահատականի։